„Alternativa Ruthenica“ представя свойофайтове глєданє за творителями котри руску заєднїцу осучаствую, же би на тот способ вона тримала крочай зоз шветовима културнима и уметнїцкима цеками. Указац же у рускей култури єст и така файта творчосци представя основни задаток документарного филма котри приказує алтернативну уметносц и културу Руснацох у Европи и швеце. Приоритет висц зоз стаємних рамикох приказованя културного живота през традицию и фолклор, и повагу унапрямиц на тото цо ше нєшка трима як алтернативне або сучасне. На тот способ ше розбива стереотипни попатрунок на национални меншини и указує ше же и найменьши заєднїци, медзи нїма и Руснаци, маю капацитет твориц дацо цо универзалне або шветове. З другого боку, зоз тим филмом патрачом ше дава єдинствена нагода же би ше през приказованє поєдинєчних уметнїкох и їх роботох упознали зоз їх творчу роботу и преширели свойо интересованя зоз рижних обласцох.
Знїманє филма почало на простору Автономней покраїни Войводини у Новим Садзе котри 2022. року ноши престижну титулу Европскей престолнїци култури. Нови Сад як административни центер АП Войводини на своєй териториї ма вельочислени институциї од велького значеня за културни, просвитни и уметнїцки живот шицких припаднїкох розличних националносцох Войводини. Як таки, Нови Сад представя идеалну рушаюцу точку за знїманє того документарного филма котри ше занїма зоз проучованьом културного и уметнїцкого живота Руснацох. Тиж так, Руснаци у Войводини представяю добри початок за филм бо ше руша од самостойней и добре орґанизованєй националней заєднїци котра витворела свою еманципацию на скоро шицких уровньох у Републики Сербиї. На Филозофским факултету у Новим Садзе направена перша розгварка за филм зоз, нажаль, покойним проф. др Янком Рамачом котри направел кратке огляднуце на историю Руснацох на тих просторох. Розгварка за филм ше предлужела у просторийох НВУ „Руске слово“ зоз директором проф. др Борисом Варґом. Варґа о алтернативней култури при Руснацох бешедовал зоз окремним акцентом на период 60. рокох 20. вику, кед ше зявює поп култура, та по сучасни часи. През кратки приказ розвоя рускей култури на тих просторох у другей половки 20. вику спомнул значних уметнїкох, музичарох, писательох, културних дїячох, як и других котри дали значни допринос у розвою того цо ше може тримац за алтернативну културу, алє и културу вообще у одредзеним часовим периодзе.
Руснаци у Войводини мали богати вибор домашнїх – югославянских и страних бендох, як и других уметнїкох на котрих ше могли спатрац, мали можлївосц як и вони пременїц, алє и збогациц културни живот стредку у котрим жию. Музика як универзални язик и вельки порушовач пременкох у новшей историї, од окремного значеня за тот документарни филм, та ше праве прето окремна повага у нїм дава бендом котри грали або граю на руским язику. Медзи старшима ґенерациями котри грали и були познати у рускей заєднїци на тих просторох видвоюю ше рок бенди як цо то „Маринер“ и „Арминґтон“ котри полнєли просториї дакедишнього младежского дому у Руским Керестуре. При младших ґенерацийох котри заґажели до 21. вику видвоюю ше панк бенди „Crazy Cousins“ и „Brainlow“ котри часто наступали на дакедишнїм Водова фесту у Руским Керестуре и велїх других свиркох на локалу. У розгварки зоз фронтменом бенду „Crazy Cousins“ Дорияном Чижмаром жадали зме дознац у чим пренаходзели свою инспирацию. Цо тото цо их гонєло або их и дзень-нєшка гонї най творя на мацеринским язику, а нє на даєдним другим? Кельо мали потримовки у своєй творчосци у стредку дзе жили и як вони видза Руснацох нєшка и їх културно-уметнїцки розвой у 21. вику? Їх наступ на Водова фесту у спортскей гали у Руским Керестуре бул од велькей значносци за збогацованє того филма бо ше ознова могол чуц и видзиц дух керестурских панкерох. Окрем панку, нащива того фестивалу вихаснована и за знїманє приповедки о єдней младей орґанизациї под назву: „Drop Sensei“ чийо коренї тиж зоз Руского Керестура. За пейц роки свойого иснованя тота орґанизация стала поза вецей як 100 музичних случованьох под назву: „Шуренє“ дзе наступали велї домашнї и страни продуценти и DJ-ове. После пейц рокох пошло ше крочай далєй, ствараюци потполно нови концепт Drum and Bass случованьох у Сербиї под назвом: „Шурикен“. То перши сербски Drum and Bass фестивал котри ше каждого лєта и жими отримує у Новим Садзе.
Окрем музичарох и членох бендох зоз Войводини, у филму вшелїяк єст места и за других уметнїкох котри самостойно творя, як цо то писатель Иван Медєши „Шукс“ чия кнїжка приповедкох под назвом „Єдзенє“ 2019. року преглашена за кнїжку рока у Републики Словацкей. Жадали зме цо автентичнєйше приказац красоти и виволаня творчей роботи людзох котри ше у нєй найду. Прето розгварка зоз Иваном Медєшийом окончена у найпознатшим алтернативним локалу у Керестуре – „Бомбаю“. Живот под санкциями 90. рокох под час войнох на Балкану, чежка материялна и духовна ситуация до котрей тедишнє югославянске, а зоз нїм и руске, дружтво упадло лєм єдна зоз темох о котрей зме бешедовали зоз алтернативним писательом зоз Войводини чийо кнїжки у Словацкей и Ческей преложени на даскельо язики.
После знїманя у Сербиї, екипа документарного филма ше селї до жемох стреднєй Европи, дзе тиж так присутни припаднїки рускей националней заєднїци. Главно место знїманя филма то простор нашей „Горнїци“, односно простор котри облапя даскельо держави як цо то: Словацка, Польска, Україна, Мадярска и Румуния. Дзекуюци финансийней потримовки Канцелариї за прейґгранїчних Словакох (Úrad pre Slovákov žijúcich v zahraničí) знїманє филма предлужене у Братислави, Свиднїку и Прешове. Република Словацка после Сербиї зазначує знатне число припаднїкох рускей националней заєднїци на своїх просторох. После мирного роспаду Чехословацкей 1993. Словацка шлїдзела драгу велїх пост-комунистичних державох восточней Европи. Либерализация и демократизация дружтва, почитованє людских правох и европских интеґрацийох приведли до звекшаней свидомосци о почитованю правох националних меншинох. Праве прето, на основу найновших податкох зоз пописа жительства Републики Словацкей 2021. року, число жительства котри ше вияшнєйли як „Руснак“ або „Рускиня“ виноши 63.556 особи цо представя заєднїцу зоз значним руским жительством у своїх гранїцох. Тиж так, як и Руснаци у Войводини, Руснаци у Словацкей помали, алє сиґурно вше вецей уживаю права котра им ґарантує держава, насампредз у хаснованю мацеринского язика и шлєбодного виражованя своєй националней припадносци. Гоч ше права Руснацох у Словацкей нє можу мерац зоз правами Руснацох у Войводини, скоро пейц раз векше число припаднїкох рускей/русинскей националней заєднїци у Словацкей як цо их єст у Войводини представя солидну критичну масу за розвой алтернативней и сучасней уметнїцкей сцени. Перша станїца на путованю по Словацкей була Братислава, односно: „Anasoft litera“ фестивал на котрим ше ознова нашла кнїжка Ивана Медєшия под насловом: „Vilkovia“ у виданю виходнословацкого здруженя „Valal“. Гоч нам намира була знїмац Ивана медзи другима авторами и публику на фестивалу, висока горучка и вичерпаносц онєможлївела Ивана же би нам ше у Словацкей придружел. Медзитим, дзекуюци велькей помоци PR фестивалу Мариї Гейтманковей, окрем знїманя самей атмосфери на фестивалу, удало нам ше зняц интервю зоз Марияном Андричиком, єдним зоз членох жирия з котрим зме бешедовали о Ивановей кнїжки на виходнярским диялекту и то на вельке задовольство нашого собешеднїка!
Република Польска держава у котрей тиж находзиме на припаднїкох рускей, односно лемкивскей националней меншини. То ище єдна европска держава котра шицким своїм гражданом дала шлєбоду вияшньованя кед слово о националней припадносци односно чувству. Таке право вихасновало скоро 10.000 гражданох котри ше вияшнєли як Лемки. Проф др. Томаш Квока, професор Яґелонского универзитета у Кракову, по националносци Лемко и роками отримує приятельски вязи зоз Руснацами зоз Войводини. Вецей раз прекладал поезию зоз руского язика зоз Войводини на язик Лемкох у Польскей. Праве прето, зоз нїм як домашнїм, свою приповедку о алтернативней творчосци при Руснацох у Польскей предлужели зме знїмац у историйним городу Краков. После розгварки о Руснацох на подручю Карпатох, їх културно-уметнїцким розвою и националним идентитету, рушели зме ше спущовац на побрежя Лемковини. Скорей того, на инициятиву нашого собешеднїка, направена кратка павза у месце Ґорлице, дзе нащивени локални радио ЛЕМ.фм и нєвладова орґанизация „Руска бурса“. Там нас щиро привитала Наталия Малецка зоз котру зме бешедовали о самим проєкту, як и о формалним сотруднїцтве медзи нашим продуцентским тимом – Асоцияцию Културанова и радийом ЛЕМ.фм, односно „Руску бурсу“.
Спущаюци ше после нащиви Ґорлицох вше глїбше до словацкей часци Горнїци, путуюци вноци през густу молгу, роздумовали зме о наших шлїдуюцих собешеднїкох. Слово о членох блек-метал бенду под назву „Ancestral Volkhves“ и „Obšar“ зоз Свиднїку, котри у своїх писньох хасновали мотиви славянскей митолоґиї шпиваюци на русинским язику. Медзитим, за розлику од автентичного амбиєнту през котри зме ше пребивали котри бул єдна зоз инспирацийох писньох спомнутих бендох, нашо перше стретнуце зоз нїма було на цалком нєзвичайним месце за музичарох такей файти. Иґор, або по назвиску познатши як „Чернорог“, вокал у обидвох бендох, дочекал нас у єдним локалним ресторану, а у подобней атмосфери знїманє предлужене ютре дзень. Нашим собешеднїком було важне наглашиц же шицко цо робели то робели прето же им ше то пачело. Руски, односно, русински язик им була вяза зоз старославянским язиком котри ше вец далєй вяже за старих Славянох и їх митолоґию котра им була главна инспирация за свою музику и писнї. Моцну жиму по котрей наступали у України нїґда нє забуду, так же домашня публика тота пред котру найволєли наступац и грац.
Зоз обецаньом же ше увидзиме ище раз на истим месце або на „Долнєй жеми“ у Новим Садзе, предлужуєме драгу на остатню станїцу на тим путованю. Рушаме до Прешова дзе нас чекала Зденка Кваскова. Ґлумица у театру Александра Духновича и шпивачка у бенду „Кваскова“ котри виводза богати, пасмовити композициї у котрих ше ґитара, котра ноши повторююци мелодични мотиви, злучує зоз електронскима ефектами. Цми и меланголични музични тони помоцнюю ше зоз енерґичнима тонами. Нєтрадицийни инструменти як цо то ксилофон и нєсподзиваюци ритем бубнох, котри уключує джез и латино инспировани цалосци, збогацує звук їх музики. Креативни аранжмани употолнює ясни звук бас ґитари. Фарба гласу русинскей шпивачки окреме наглашує символични музични вираз. Попри того же грає на синтисайзеру, Зденка чувствительно шпива власни тексти и на своїм мацеринским русинским язику, и на словацким язику. Їх тексти представяю отворени вияви; вони интимни, мистични, без виволованя жалосци, аж и теди кед описую спокуси зависносци або проблеми у медзилюдских одношеньох.
Тото путованє дало нам єдинствену нагоду витвориц моцнєйши контакт, як зоз Руснацами на Горнїци, так и зоз руску/русинску алтернативну и сучасну творчосцу. Нашо путованє лєм цо почало и ище вельо того остало зазначиц и виприповедац. Европа нїґда нє була мирне место, прето и жаданє най ше пременї животни простор медзи жителями єй державох и нєшка барз моцне. Восток и юговосток Европи окреме ше визначую як турбулентни. Праве прето, велї Руснаци зоз тей часци Европи як и велї други народи одлучели свойо щесце, живот и кариєру поглєдац у даєдних других державох. Велї млади, мудри и креативни людзе рушели по тей драги и пренашли себе у нових сферох. Зоз окремну повагу жадаме чуц и приказац їх приповедку. Кельо им значи шицко тото цо вони зоз собу и у себе принєсли зоз своєй заєднїци до нового стредку? Чи их тото инспирує, чи творя дацо нове? Як доживюю себе, кельо важне або нє важне одкаль походзиме?
Шлїдуюца станїца Република Горватска, дзе место знїманя Вуковар и приповедка о горватским реперу руского походзеня Мирославови Канюхови, „Вуковарским братови“. У тих крайох руска заєднїца вельо меньша як там дзе зме по тераз були, а самим тим меньши и можлївосци за розвой сучасней и алтернативней уметносци. Прето нам на тих просторох цикави и людзе руского походзеня котри нє творя на своїм мацеринсим язику. З нїма жадаме побешедовац о тим прецо такей култури нєт. Чи слово о простей демоґрафиї чи о даєдних других факторох котри вплївовали на розвиванє, або нєрозвиванє такей уметнїцкей сцени або уметнїцкого виражованя. Початок 2023. року уж резервовани за єден нови и векши круг по Стреднєй Европи дзе нас обчекую нови члени бендох и други уметнїки руского походзеня, насампредз у Ческей, Польскей и України.
Хвильково робиме на тим же бизме достали цо векшу финансийну и другу потримовку з боку наших донаторох. Розполагаме зоз финансийну потримовку котру маме дзекуюци новосадскей Городскей управи за културу и маме обецанє од „John and Helen Timo Foundation“ зоз Зєдинєних Америцких Державох же нас тиж финансийно потримаю. Вшелїяк, без огляду на средства ми предлужуєме знїмац и указовац кельо уметносц котра ше твори на руским язику тиж так и европска, односно шветова уметносц. Наздаваме ше же на концу наш филм будзе ище єдно прешвечованє же зме шицки, чи мали чи вельки, заш лєм подобни.