Увод
Такой недавно на сюм сайтови могли сьте видїти інтервю из Миколом Бобинцьом – коордінатором русинськых орґанізацій, репрезентантом Пудкарпатя на Світовӯм Конґресови Русинӯв. За первоє мушу подяковати редакції за таку ініціатіву, бо серія інтервю из подкотрыми людьми дуже нам хыбит, а у сись час ниє кому ї провадити. Микола Бобинець не часто є фіґурантом сякых інтервю, та добре, ож ткось мав на такоє дяку тай час.
Дуже ся надїву, ож серія ся продовжит, тай будеме мати можнӯсть “учути голос” и другых важных у нашӯм двиганьови люди. Айбо раз вернїм ся ид тому, што уже є опубликовано.
Зачати хочу из того, ож вопросы редакції были містами доста острыми тай провокатівными, што бы ся направду и чекало выд інтервю сякого формата. Бо Микола Бобинець занимат дуже важну посаду про русинськоє кываня, а значит и нарокы на нього сут дуже высокі, та хотїли бы сьме обы вӯн тому зодповідав.
Дале бых хотїв покрітіковати конкретні удповідї, тверджіня самого Миколы.
Крітіка тверджінь Бобинця
- Першый такой вопрос каже нам, ож в удношіньови до Пудкарпатя маєме даяку інформаційну “чорну дїру”. Сесе мусиме розуміти так, ож чилядь поза Украйинов, наприклад такой у Америцї, не розуміє ся што ся у нас дїє, тай што чинят русинські орґанізації.
Удповідь Миколы мене читаво шоковала, тай є прикладом некомпетентности. Чилядник на сякӯв позиції не може удповідати “никайте мою сторӯнку на фейсбукови”, сесе дуже непрофесійно. За первоє, далеко не усї руснакы мавут фейсбук, а даже кобы мали, та лична сторӯнка Миколы Бобинця ниґда не має быти основным жерелом інформації за його роботу.
Коли коордінатора русинськых орґанізацій звідавут што ся дїє на Пудкарпатьови, та чекав бых, ож буде му што уповісти кроме як “читайте на ФБ”. Рахуву сякый уровинь комунікації недобрым. - Такой слїдуючоє звіданя редакції справедливо інтересує ся, ож як ипен Микола Бобинець став репрезентантом Пудкарпатя на Конґресови.
Зась, ниякої конкретної удповідї, кроме фактӯв за які и так ся знає, не было. Могли сьме учути чом ипен выкопкали Сидора, могли сьме чути які были другі алтернатівні варіанты, тай як ипен Микола Бобинець быв лїпшый выд другых потенціалных претендентӯв на исю позицію. Айбо – нєт. Не учули сьме абсолютно нич, кроме неприпустимого у сюв ситуації “всьо є на ФБ”. Чом исе не добрі читайте у спередущому пунктови. - Далшый вопрос ся дотыкав того, як сам Микола Бобинець видит днишньый Світовый Конґрес Русинӯв из ушыткыма його проблемами, тай якоє є його видїня будучности сьої орґанізації.
Туйкы удповідач справедливо уповів, ож, на бану, не маєме ниякої другої орґанізації, котра бы репрезентовала руснакӯв у світови. Раз сесе безалтернатівна опція.
Айбо зась, удповідь была дуже скупа, суха. Каже ся, ож сут якісь провбы модернізації орґанізації, айбо які? Што ся сим хотїло уповісти? Туй бы ся хотїло учути май нашироко. - На звіданя за културно-політичну платформу Микола Бобинець зась удповів без удповіди. Цітувучи удповідача – “караван иде дале”.
- Далшый вопрос дотыкав ся свад помежи русинськыма орґанізаціями в Пудкарпатьови.
Туй онь ганьба, ож чилядник, чійов роботов мусит быти коордінація сих орґанізацій помеж собов, зась нич не уповів, ай лиш пустив дым у очи, кажучи ож тото Украйина пробує нас посважати. Украйина, як держава, у бӯлшости просто іґнорує нашоє єствованя. Не знаву ци варта за йсе нагадовати Миколови Бобинцьови, айбо руснакы валовшні ся посважати и без вонкового влива. А його роботов мало бы быти тоты конфлікты зглажовати.
Цітуву Миколу, “Ни є того, тко бы муг заступити ся з Руснакув Подкарпатя”, тай нагадуву му, ож сесе мала бы была быти його робота, як коордінатора тай представника – заступати ся за руснакӯв. - У слїдуючому вопросови редакція сайту звідат ся які у орґанізації Бобинця сут далші цїлї?
Туйкы удповідач зась сам себе шпотат. Бо перша цїль у исписови ото узнаня русинӯв в Украйинї, а Микола Бобинець за 15 рокӯв, котрі є репрезентантом тай коордінатором русинськых орґанізацій, не має што розказати.
Я добрі розуміву, ож тото не є штось легкоє, тай ож сякоє ся не чинит за динь. Айбо туй сьме чекали учути хоть даякый куртый звіт того, што ся удбыло за 15 годӯв. Микола не раз тай не два уголошовав, ож уже скоро-скоро ладит ся стрїча из даякыми депутами обы убговорити потенціалноє узнаня народности “русин” в Украйинї. Ци удбыла ся тота стрїча? Кидь нєт, та чом? Де за тото мож прочитати?
У контекстови сього вопроса хочу спомнити, наприклад, за звіт Миколы Бобинця на світовому конґресови у рокови 2023.
Микола Бобинець. Звіт про свою працю для русинів в Україні на Cвітовому Конґресі Русинів 18.08.2023
– На семӯв минутї відеа споминат ся мала книжечка, котра є компілаційов ушыткых убернень ид державі Украйина из нашыми прошінями. Сяка книжечка дочасти и є тым звітом, котрый мы, як читачі інтервю, были бы раді видїти. Но чогось у інтервю на ниї ся міста не найшло. Хотїло бы ся ї видїти щи даґде, кроме сього відеа.
– На удмітцї 7:53 споминат ся якраз тота голосна стрїча из “представниками влади”. Чом ся за ниї бӯлш ниґда тай ниґде не споминало? Чом за стрїчу, котра зодповідат першому, майважному, пунктови у цїльох орґанізації, споминат ся у самому кӯнци звіта? Чекало бы ся, ож за майважні моменты мусит ся говорити у першу очерїдь.
– Прощӯн бы Чухран Михаїл лишив нас дуже нагле, бануєме за такым честованым русином. Айбо не вижу, чого бӯлша половина звіта Миколы Бобинця мала быти приурочена віршови Чухрана. Сесе ділетанство тай непрофісоналізм. Раз ся мала пошорити робота. - У слїдуючых вопросах Микола Бобинець зась сам себе шпотат, бо у вопросови за молодых тай перспектівных руснакӯв вӯн побировав ся здогадати лишек за дві фамілії. Ци не ганьба буде чилядникови, котрый 15 рокӯв рядит русинськыма орґанізаціями, уповісти, ож за исї 15 рокӯв вӯн побировав найти лиш двох люди, з котрыма мож робити? Туй авадь другі руснакы повымирали, авадь коордінатор русинськых орґанізацій не побировав зробити свою роботу.
- А вопрос будучности русинӯв за 10 годӯв посиловав ся щи май задумати. Микола Бобинець у своюв удповідї прогнозує дуже позітівный, може даже містами наївный сценарій. Ци направду є реалістичным про нас за 10 годӯв здобыти бӯлше, як ся досягло за минулі 30? Читаво ся у тому сомніваву.
У продовжіня сьої темы хочу спомнити слова и Юрія Шиповича, інтервю из котрым было опубликовано другым у шорови, де вӯн уповів ож реална активнӯсть русинськых орґанізацій у 90-х годах была май продуктівна, май слїдно йих было, гикой ся тото стало у далші 20 годӯв. Причин на тото є дуже много, ото и одумираня нашої інтеліґенції, и інформаційні провокації спозад котрых много добрых русинӯв удказувут ся уд хоть-якої актівности у нашӯм кываньови, и много другого…
Знавучи исю інформацію, котру Микола Бобинець бизӯвно тоже знає, тяжко віровати його словам за світлу будучнӯсть за 10 годӯв. Айно, мусиме мати надїю тай старати ся на тото, но не можеме на ся брати “ружові околарї”.
Што направду хочеме?
Гикой руснак, гикой релатівно актівный у културному планї чилядник, чекав бых выд сього інтервю бӯлше конкретікы. Чекав бых ож Микола Бобинець даяк май у детальох розкаже за свою роботу тай планы. Чекало бы ся, ож репрезентант Пудкарпатя на конґресови буде мати даякі алтернатівні каналы комунікації из людьми, кроме личної сторӯнкы у соціалнӯв сїтї Facebook. Уже нич не кажу за тото, ож тоту інформацію мож бы было продуфловати по-аґліцькы, обы нашым цімборовам за великов млаков тоже было дашто чути. Раз за сякоє не говориме, бо ани по-русинськы не можеме тото прочитати.
Спозад тіпа роботы, яку маву, часто мушу нарабляти з людми, коордіновати роботу спеціалістӯв у єднӯв командї, пораз коордіновати дакӯлко команд межи собов. Завто знаву, ож робота сякого коордінатора ото не фіґля, тото направду тяжко. Айбо на другого бока, кобы така робота ся направду робила, та было бы за ниї што уповісти! А Микола Бобинець у сьому інтервю дав дуже скупу крыхӯтку інформації.
Аж бы руснакы в Пудкарпатьови направду могли собі выбрати репрезентанта у світовӯм конґресови, ниґда бых не проголосовав за Бобинця, бо пӯсля 15 рокӯв свої роботы вӯн не побировав структурно удзвітовати за проробленоє ним. Бездержавный народ, за котрый ся ниє кому заступити, не може собі позволити мати лідера, котрый не побирує подружити межи собов 5-6 русинськых орґанізацій, котрый не побирує вести за собов бӯлш як двох люди.