У што вірят наші нынішні лідеры, што вни думавут за одроджіня послідньых 30 рокув? Што щи май важно — якый має быти, подля їхнього назора, наш путь уперед? Пойте ся дузнаєме за йсе. Зазвідайме в них тото, што нико окрем нас не зазвідат. Нашоє первоє інтервю — репрезентант Пудкарпатя на Світовум Конґресі Русинув, Микола Бобинець.
— Дякуєме, же сьте ся согласили дати нам сесе інтервю. Што д Пудкарпатьови, та в його одношеньови екзистує даяка інформаційна чорна діра, натулко читава, же многі ани не знавут, што ся тамка домак творит, не знавут люди одтам. Ци годни сьте розказати мало, одкі сьте, як исьте зачинали свуй путь русинського актівішты?
Што до чорної дїри, то є моя сторонка на ФБ, група на ФБ “Руснакы, Карпатські русины, кулько нас є”. Там є вшытка информація про діятельность Русинув на Подкарпатьови. Я родом из Мукачева, Росвиґово(Оросвийґ, руськый кониць). Зачав свою діятельность ищи у далекому1998, коли у русинськоє общество Мукачева привів ня муй нянько(прощений). Пак голова варишського общества ПР 2000 гуд, голова Крайового общества ПР 2005 гуд, член СРР 2009 г.. Провів Світовый конгрес Русинів на Подкарпатьови 2013г., фестивалі у Мукачеві, Сивлюши и много, много дальших активіт, як дома, так и за готаром.
— Вас, ачей, майбулше знавут ги репрезентанта Пудкарпатя на Світовум Конґресі од 2009. рока, и, выходячи з сього факта, мож уповісти, же з того часу сьте офіційный “лідер” народа. Розкажіт, як исьте стали лідером Пудкарпатя на Світовум Конґресови, и што сьте, подля вашого назора, досягли за сесь час?
То ся стало по тому, як СРР исключила из свого состава о.Д.Сидора у 2008 г.. Тогдашный голова СРР П-Р.Маґочій предложив Крайовоє общество ПР замісто Сойма ПР. На конґресі у Сербії, 2009 г., мене и затвердили членом СРР од Подкарпатя. Мої досягненя довго перечисльовати, ай бо всьо є на ФБ.
— На які проблемы теперь наражувут русины, котрых, може, не было в 1991. авадь даже в 2009. році? Ци оцінюєте вы особно Світовый Конґрес ги штось хосенноє, и ци вартує вун хоть дашто у тум стані, в котрум вун є теперь?
Мої думки из сього звіданя такі: айно СКР є хосенним хоть лем из-за того, же дає до рокаша народ, який у світі не має свої держави. Русины світа зберавут ся раз на два роки оби подїлити ся своїми активітами, друкованьом, идеями. Паралелно проходить и Світовы конґрес молодих русинів. Так, розуміву, ож може СКР и потребує даякої модернизації и о том ся фурт не лем говорить, а и пробує ся робити.
— Яка ваша културно-політична платформа (што вы пропонуєте ги лідер) и як довго вы хочете репрезентантовати Пудкарпатя всьому світови именем русинув? Ко окрем вас, подля вашой думкы, заслужує репрезентантовати Пудкарпатя?
Культурна платформа усокотити традиції, културу, бисїду, усе споминати за нашу правдиву исторію, наших Будителїв. Поддержовати молодых поетув и писателюв, ОНИ є нашов надїйов и перспективов.
— Не годни сьме іґноровати тот факт, же многі люде кажут, же у туй роли, котру маєте теперь, исьте некомпетентный, ай окреме, же не выдоволюєте жаданьом той посады. Што сьте годни на сесе одповісти?
Не уповім, же многі люде. Добре знаву тих критикантів, што йсуть типирь на обочині світового русинства и поливавуть грязьов тих, тко каже у очи правду и робит хосен дїла Русинів світу. Но кось критикує, а караван иде дале. Я не одноособно себе убрав, уто была воля Русинув Подкарпатя.
— Каждый знає, и мы сьме за вто тоже писали, же уднушні свады й розлады в русинськум активізмі не сут чимісь рідкым. Моментално маєме натулко много вшелиякых орґанізацій тай фракцій (у дакторых из котрых, як исьме чули, маєте членство и вы), же тяжко вцілови дати якусь дефініцію нашому двиганьови авадь нашуй “філозофії”. Як ся знає, послідньый час не было ани якого політичного проґреса у сторону вызнаня карпаторусинув в Україні. Што вы думаєте за теперішню ситуацію в сюм реґіонови а што думаєте за такый назор (котрого ся держит ай ОРР), же тоты орґанізації сут неефективні?
Што ся тыкать свады, усьо дуже просто. Державі Україна не выгодно, обы Русины были здружені, держали ся рокаша. Принцип розділяй и властвуй є добрим инструментом послабленя , розбитя любої общности людий. На даный час є чотири активні орґанізації на Подкарпатьови, што мавуть позитивну динаміку и активность: Крайовоє общество ПР, Свалявськоє общество ПР, Літературно-културноє общество, обласноє общество им. А.Духновича.
Всі дальшы авадь ся “розсипали”, не мавучи файного орґанізатора, а вадь екзистувуть лем на “папери”. Чому ни є позитива у вопросови узнаня Русинів в Україні, бо ни є доброї воли за готаром тих , тко муг бы помочи, кажут, ож не на часі, раз не до того… . Ни є того, тко бы муг заступити ся з Руснакув Подкарпатя, што живуть на земли, удкіть розойшли ся по світови.
— Накулко мы розумієме, вы тоже стоите у чолі орґанізації. Ци годни сьте розказати нам мало май детално за єї цілі, єї назоры и ко з нынішньых русинськых діятелюв є членом вашой орґанізації?
Наші цїлі:
- Узнаня національности Русин в Україні,
- Усокоченя нашої кульурної, историчної и реліґійної отцюзнины.
За дїятелів можу назвати много, напримір: М.Завадяк, И.Кушнір, М.Феєр, Е.Канчій, М.Чикивдя, М.Поцко, М.Маровій, … . Можу довго перечисльовати, звідайте у любому районови , реґіонови Подкарпатя за мене.
— Ко з молодых русинув Пудкарпатя дават вам надію на будучность?
Мигаль Чикивдя, Василь Крічфалушій.
— Як си думаєте, якоє положеня будут мати русины через десять рокув?
Вірю, же такоє, як типирь мавуь Русины у Європі.
— Ци є щи дашто такоє, што бы сьте хотіли дати знати за себе авадь за свою роботу, што не было туй обговорено?
Думаву обговорили сьме ушытко. Передайте поздрав од Русинув Подкарпатя, Русинам Америкы. Было бы хосенно учиниты онлайн конференцію меджи нами, активістами, патріотами. З Богом.