У нєшкайши час ше шицко круци коло дружтвених мрежох котри нам указую на тото же без нїх наисце досц чежко функционовац. Досц познати и нєправдиви стереотип о Руснацох то же знаю буц дакус „заостати“ зоз рижнима трендами, так же пришол час же бизме голєм з даякого аспекту доказали же то нє так. У тим тексту буду приказани праве даєдни Инстаґрам боки котри исную на тему Руснацох, и котри побиваю тоти стереотипи же ше Руснаци нє знаю найлєпше знайсц на Интернету.
Pact Ruthenorum (@pactruthenorum)
Здруженє о котрим сце уж могли пречитац дацо вецей на тим сайту у статї котру написал колумниста Иван Канюх. Пакт Рутенорум нєвладово и нєпрофитне здруженє котре створене з цильом же би повязало младих знука рускей заєднїци. Тото здруженє отримую млади зоз Руского Керестура, и на їх Инстаґрам боку можеце пренайсц шицки активносци котри вони орґанизовали, од рижних манифестацийох и конкурсох, до преподаваньох и забавох.
Тот Инстаґрам бок креирани у септембру 2022. з нагоди наиходзацого попису жительства котри бул отримани у октобру истого року. Приказованє националного идентитету, припадносци и стимулованє других особох же би ше вияшнєли як Руснаци на попису праве тото цо тот бок ма за циль. Гоч попис жительства прешол, мотив „Руснаци зме” останє присутни єден длугши час на здогадованє же хто зме и цо зме. Ми ше вияшнєли на попису як Руснак и Рускиня, а ви?
Младеж зоз Дюрдьова (@mladez.djurdjov)
Пакт Рутенорум на даяки способ представя главни печат младих зоз Керестура, а Младеж зоз Дюрдьова представя пиху и млади надїї ище єдного руского валалу. На тим боку можеце шицко дознац цо ше случує знука заєднїци у Дюрдьове – од рижних проєктох и збуваньох, до забавох и креативних темох и видеох. О тим здруженю тиж так писал колумниста Иван Канюх, котри дакус детальнєйше виприповедал їх приповедку.
Офарбени Руснаци (@ofarbeni.rusnaci)
Тот Инстаґрам бок єден од найориґиналнєйших бокох котри можеце найсц. Памятки наисце дацо драгоцине, алє вони знаю вибляднуц, и прето можеме повесц же фотоґрафиї ту же би отримали и очували памятки котри блядню. У нє так далєкей прешлосци фотоґрафиї були ище вше чарно-били, и можебуц прето нє маме чувство же тоти фотоґрафиї представяю живи памятки. Тот Инстаґрам бок праве прето и ту, же би нам дошлєбодзел и оможлївел же бизме одредзени фотоґрафиї почувствовали дакус баржей, и патрели на нїх чувствуюци памятки у цеплих фарбох.
Школа Петро Кузмяк (@petrokuzmjakskola)
Як цо и сама назва гвари, тот Инстаґрам бок представя єдну од найвекших и найуспишнєйших школох на руским язику. Тото же школа ма свой Инстаґрам бок нє єдина прикмета котра указує на модернизацию едукациї и самей школи, алє и рижни проєкти, усовершованя, тренди, пракси, сайми итд. о котрих можеце дакус вецей почитац на самим боку. Верим же ше велї родичи и будуци штредньошколци зацикавя кед увидза як одвичательни и заняти особи водза рахунок о тим же би сама настава и школа провадзела каждодньови збуваня котри цикави, и зоз тим роздумали ище баржей о школованю у тей школи.
Руски културни центер (@rkc_matka)
Официялни бок руского културного центру котри ше находзи у Новим Садзе. Место дзе можеце присц на културне збуванє, друженє и пице, подаєден концерт и уметнїцке водзвигованє. Простор котри праве направени за шицких младих, окреме за Руснацох, котри сцу препровадзиц квалитетни час зоз другима Руснацами кед нє маю дзе индзей пойсц. Зоз провадзеньом того боку мож дознац цо тото цо млади у тим центру шицко робя, чому доприноша и цо зоз самого центру зоз собу виноша.
Перши Лемко радио ма и свой Инстаґрам бок! Сам радио постої ище од 2011. року, и можеме повесц же є єден од найуспишнєйших радийох по руски. Тот радио можеце слухац прейґ самого lem.fm вебсайту або прейґ їх власней апликациї за Андроид, а дотля можеце провадзиц їх Инстаґрам бок котри и визуелно приказує шицки новосци о котрих ше на тим радию приповеда.
Подкарпатска Рус (@podkarpatskarus)
Можеме повесц же тот бок дакус озбильнєйши бок и подосц успишни, за шицких котри любопитлїви и котри любя саму историю Руснацох або би ю любели научиц. Рижни мапи, занимлївосци, дньови шор и прекрасни слики тото цо на тим боку можеце найсц. Вельо назви и ище вецей датуми котри вредни паметаня.
КУД Жатва, Коцур (@kud.zetvakucura)
Спомли зме и Керестур и Дюрдьов, а знаме же котри то и треци войводянски валал котри нам остал нєспомнути. Дружтво котре основане ище 1989. року, Културно-уметнїцке дружтво з Коцура, на своїм Инстаґрам боку представя шицки новосци и рижни секциї котри успишно отримую зоз своїма младима.
Руснак, дружтво Руснацох у РХ (@rusnakdrustvo)
Кед же сцеце знац цо ше у Горватскей случує, ту Руснак! Можебуц их нєт вельо, алє правда така же знаю направиц добру атмосферу и збуваня, и тому шведоча шицки фотоґрафиї котри мож пренайсц на їх Инстаґрам боку.
Новинско-видавательна хижа Руске Слово шицки вистки котри обяви на своїм официялним вебсайту и Фейсбук боку обовязко обяви и на Инстаґрам боку. Так же, кадзи ґод кед попатрице, вистки вам нє можу прейсц нєобачено.
Инстаґрам бок котри уж длукши час нєактивни, алє є окремни по тим же є шалївого гарактеру и прилагодзена младим и їх гумору. Верим же зме ше шицки пренашли голєм у єдней франти, и самим тим и нашмеяли. Хтори Руснак або Рускиня нє любя мими?
Руска история (@rusyn_history)
Ище єден бок котри едукативного и информативного характеру котри пошвецени рускому народу и самей историї. Нажаль, и тот бок уж єден час нєактивни, алє ше наздаваме же єдного дня буду обявени нови подобни змисти.
Єдина руска предавальня котра постої на Инстаґраму, прейґ котрей можеце достац вельо рижни ствари котри маю руски мотиви – од маїцох и кнїжкох, до рижних прикраскох.
Carpatho-Rusyn art (@rusynart)
За конєц охабям ище єден бок котри тиж нєактивни, и за котри бим наисце любела кед би ожил. Окремни и цикави бок котри дава нагоду шицким Руснацом котри творя уметносц же би ше споєли и подзелєлї свойо приповедки и творчосци.
Начишлєла сом вкупно петнац Инстаґрам боки котри вязани за Руснацох, и верим же их єст ище вельо котри сом нє спомла, а вредза досц же би були спомнути. Руснацтво иснує и на Интернету, цо уж представя єден вельки крочай ґу сучасному животу и отримованю шветового уровню и припознаваня. Тото цо ми з другого боку можеме поробиц, то праве же бизме потримали шицких котри ше намагаю же би дачому допринєсли през тоти дружтвени мрежи и тримали крочай зоз шветом. Вєдно, верим же можеме направиц єден вельки виртуални швет на Интернету котри нам помогнє у будованю заєднїци и знука того швета, и звонка, у стварносци. До теди, запровадзце и наш Инстаґрам бок The Society for Rusyn Evolution (SRE | ОРР | ДЕР) (@rusyn_society) кед же сце ище вше нє, и потримайце нас же бизме вибудовали тот швет!