Курта публікація 3: Прōбудженя русинськōй ідентичности: плеканя наслїдства дїля будущых поколїнь
Пōдкарпатя, исе красна часть Украйины, што свалит ся свойим унїкальным културным наслїдством, де важноє місто занимат и русинська бисїда. Айбо днишня ситуація не робит ї положеня легкым. Вызнаня выд державы не є, як и не є ōсвіты на русинськӯй бисїдї. Як спасти русинськый язык тай всокотити го в Пōдкарпатї?
Запуск языковых клубӯв тай гурткӯв. Исе годно видїти ся простым, айбо языкōві клубы вчинят красну можнōсть людям стрічати ся, бисїдовати тай учити русинськый язык.
Русины Пōдкарпатя мōжут єднати ся у языкōві клубы тай гурткы, де русинська бисїда жива и непередавана. Исї встрічі мают стати містом міняня языковыми знанями, бисїдованьом тай даже орґанїзацїйōв културных мироприять русинськōв бисїдōв. Языкōві клубы мōжут учинити такоє місто, де русинськый язык буде ся указовати, такым, ги вӯн по-правдї є, а учасникы клубу гōднї будут практиковати бисїду тай учити нōві слова тай выразы ворохом
Родинна пӯдпора бисїды. Родина играт ключову рōль у всокōчиню русинського языка в Пōдкарпатя. Хоснованя рӯднōй бисїды дома стає важнōв частьов каждоденного живота. Родинна пӯдпора указує ся в гōвōріню миж старшинōв тай дїтьми, у читанї русинськых книжок тай у хоснованю бисїды каждый динь, усяды де мож.
Исе пӯдпора не лише помагат дїтям сокотити русинську бисїду, ай передає языковоє наслїдство будучным пōкōліням. Отвітственōсть старшины є у тōму, убы творити атмосферу, де русинськый язык вызнає ся и честує ся, як часть културного наслїдства тай національнōй індентичности.
Межинародна спōлупраця. У контекстови всокоченя русинського языка в Пōдкарпатю, важно роззирати мōжнōсть межинарōднōй спōлупрацї. Русины по всьому світови гōднї спōлупрацьовати из усякыми межинародными орґанїзацїями тай обществами, кōтрі пӯдпōруют реґіональнї языкы тай културы.
Ися спōлупраця гōдна у ся включати міняня ідеями, ресурсами тай даже фінансōвōв пудпōрōв. Межинарōднї орґанїзації гōднї посприяти утвореню языковых проґрам, научных дōслідӯв тай културных ōбмінӯв, направленых на всокоченя тай пōпуляризацію русинського языка.
Важно установити всязь из орґанїзацїями, кōтрі уже мают опыт у рōбōті из бисїдами тай културами нацменшин, тай старати ся вывчити ліпші практикы, убы захосновати їх на теритōрії Пōдкарпатя. Межинародна спōлупраця розширят возмōжнōстї и кріпит позицію горожан, што стōят за всокоченя свōї бисїды тай културного наслїдства.
Мережі и соцмедіа. Дякуючи типирішньым технолōґіям мож учинити бисїду дōступну дїля вшиткых через соцмережі тай інтернет платформы. Днишньый світ інтернету тай соцмереж выдкрыват много можностий дїля всокоченя тай пōпуляризації русинськōй бисїды в Пōдкарпатї.Приміром, Facebook, Instagram, Twitter надают мōжнōсть говорити, публіковати, тай мінювати ся інформаційōв русинськōв бисїдōв. Йсе сприят свōбōднōму приказованю тай пōпуляризації бисїду межи нового пōкōліня.
Спōлупраця из русинськыми обществами. Обща робота из пōдкарпатськыми русинськыми орґанїзацїями тай дїячами дозволит зобрати бӯльше людей до спаса русинського языка.
Общества гōднї выступати ініціаторами тай координаторами языковых проєктӯв, гōднї ся заняти орґанїзацїями всякых тематичных фестивалюв тай добивати ся вызнаня на высокōму уровни. А соспōльна робота из орґанїзацїями може поєднати ресурсы тай силы з цїльов пӯдпоры рӯднōй бисїды.
Исе вшитко помогло бы всокотити тай пōпуляризовати рӯдну бисїду у сьогочасных тяжкых реаліях. Главноє, не втрачати віру тай сокотити надїю на будущу рōбōту по розвōю бисїды.