Кратке и хасновите упутствиє за младих/старих забойнїкох
у центру швета – Руским Керестуре

Як скриц мертве на валалє?

Млади/стари, у Руским Керестуре сце, нєт цо мудре робиц по цали жимски днї и случи вам ше же у налєту афектох ше зошлїжнє рука, омрачице дакого, а тот „руци лошку“ и нє пойдзе по ню. Цо робиц? 

Ниа даскельо конструктивни предкладаня:

Два пайпи скорей „широкого“

Кажде хто ше дакеди прешейтал по беґелю з валалского боку мог замерковац два бетонски хижки кед ше дойдзе по так волани „трокутˮ дзе ше крижа керестурски беґель и тот други нєкерестурски беґель. У єдней зоз нїх єст два пайпи котри иду напевно даскельо километри под хотар аж по валалску шинтерню – место за спальованє животиньских мертвих целох. Е, ту перше и повед бим найлєпше место же би сце ше ришели цела кед ше нєздобачки случи же забиєце. А швета, стрес, беганє, горучка, та праве же ше може случиц. До тей пайпи ше мож ухпац 100-200 метери зоз тим труплом и нїхто нїґда анї найдзе анї напаха, а анї случайно тамадз нє наидзе.

Шахти у школи

Шицки ми Руснаци котри жиєме на тих просторох и ширше голєм дакеди були на фестивалу фолклора и жридловей шпиванки под отвореним нєбом у нашей школи. Як млади, будуци серийни або лєм рекреативни забойнїк нє могли сце нє замерковац вельочислени шахти до котрих ше злїва школска канализация. Кед ше уж случело нєщешлїве и нє знаце кадзи зоз труплом ниа ришенє. Отворице єдну од тих дзешаткох канализацийних покривкох и нїхто нїґда после вас там нє отвори, або напаха дацо, бо и кед забухци та будзе же даєдного школярика загнало од нєдобре премитей пост крачунско-новорочней квашеней капусти.

У месара вискладац до меха

Нє прави сце валалчань кед сце дакеди нє були на клачки швиньох и дисновторох. Або нєшка уж частейши случай, да ше животиньово трупло до месара, та вон забиє и оброби. Но, та так раз кед ше пойдзе по нарезани меса, колбаси, уха, скорки и други часци мертвей животинї, треба виняц зоз рекли склєнку палєночки и повесц же ниа я принєс най почеркаме. Та дас после пиятей, шестей додац же: „Пан бачи майстор… Тота ваша машинка за месо умита уж? Ниа, мам ту лєм з дому дачого, у авту… Зомлєли би сце ми то, помогнєм и я… а вец дорубеме склєнку…ˮ. Знаце же би добри валалски майстор помогнул чловекови у бриґи. А вец зоз тим чи ше пси чи риби на беґелю накарми, або вноци покрадзме до ресторану до змарзляка подаровац.

Опитац ше у карчми Мумбаи же кадзи зоз „тимˮ

Нє знам кельо читательови познате, алє у карчми Мумбаи ше зна шицко. Алґоритми АИ-я котри ма Google ище виками ше маю керпиц же би дошли до таких студньох мудросци як тоти до котрих чловек може зисц у тей карчми и окрипиц ше з нїма там долу. 

Читателю най ци признам, о тим аж раз и було там бешеди и ниа яки дати ришеня:

– Я би го зарезал и правел бим штучного гною з нього NPK 15:15:15 и шицким добре. Єдна будала менєй, а мойо польо препатрело!

– Пач мали, мертве цело мушиш розпрац и руциц до канализацийней дзири. Бактериї го поєдза за тидзень.

Читатель оштрого розума може видзиц же тото друге понукнуте би ше могло викомбиновац зоз школским шахтом.

Дакому до гроба

Можебуц наймудрейше од шицкого, отвориц чийшик гроб и там спаковац. То и хумане цошка зоз запахом на достоїнствене. Хто то будзе препатрац? Нормално, ту треба патриц же би нє бул даяки сто рочни гроб, почим ше там уж можебуц нове будзе ховац та най нє найду.

Коло каменя фундаменту на виходзе за Лалич

Читателю, тот там камень фундамент положени цошка пред уж дас 20 роками. Политичарски хемороидни хематом ше висликовал при ньому и од теди камень там стої як прекляти. Треба ту дацо додац? Як стало 20 роки, та так будзе ище 1020 без най ше помкнє цошка ґу тому цо там уж задумане було, а уж и наглупши нє паметаю цо теди тот политични балван обецал спред тв екипох. 

Керестурска „хладзальняˮ

Дзекеди пиха валалу. Аорта керестурского привредного живота котра кармела стотки фамелийох и отримала Руснака виталним на тим просторе. Бул то заварти круг Хладзальня – фабрика змарзнутей поживи, Фарма статку, та фабрика за статково єдзеня, рибняк – лєм цо нє держава у малим. Но, алє то нє муши буц конєц. Дзекуюци просперитету того дружтва то постало громада зароснутих празних ханґарох, помоцних обєктох, шопох, хлївох, ґаражох. И тераз кед уж нє далєко час же ше шицки на громади почнєме биц и забивац, шицки тоти обєкти годно похасновац же би ше цали єден валалски швет могол там закопац, скриц як кед би нїчого нє було и нїч нє постояло.

И за конєц надпомнуце: Нє робце тото дома.