У руских заєднїцох и рижних институцийох часто зна запановац песимизем, а дзека за напредованьом щезує. Старши оставаю док младих нєт же би пришли, завжали место и направели пременки, а причини котри доводза до того знаю буц рижнородни. Цо тото цо одбива младих од намаганя, и чи вони наисце и маю нагоду указац ше? Ми Руснаци як таки наисце традиционални, патриярхални и конзервативни, алє найвекшу гришку правиме кед вельо вериме нашим кореньом. Нє чежко запаметац презвиска котри характеристични за нас як мали народ. Крев котра чече през нас, повязує нас до єдней нїтки. Ниа, и тота нїтка ше зна змервиц, и теди наставаю бриґи. Кельо раз зме видзели на одредзених сходох, манифестацийох, роботних местох итд. людзох котри ноша исте презвиско або су истого походзеня? Єден бок гутори же то случайносц, док з другого боку на велько пише – непотизем и кронизем.

Тот котри достанє власц, страци розум.

Платон

З оглядом же ше у остатнї час наисце намагам фокусирац на корень проблемох котри ше одноша на наш национални идентитет, як и на практични ришеня котри можеме витвориц а нє лєм млациц празну сламу, любела бим тиж так спомнуц и тот аспект котри ше дотика непотистичних крочайох медзи нами. Я свою моц котра ше наволує шлєбода думаня и писаня нє хаснуєм на особни хасен и нє жадам нїкого директно преволац, та з тим анї єдно мено анї нє будзе спомнуте, алє верим же кажде хто пречита тоту статю подума на голєм єдну особу у своїм околїску котра ма вязи зоз тоту тему, а лєм садац можеме чийо мена ше найвецей буду споминац у наших думкох.

Слово непотизем (италиянски nepotismo) засноване на латинским кореню слова nepos цо ма за значенє шестров або братов син. Тот термин ше зявел ище у штреднїм вику при католїцких папох и владикох котри нє мали своїх потомкох, алє мали синох од своїх братох и шестрох котрим давали високи и квалитетни позициї. Цо тото цо поруша чловека же би зробел шицко за моц, аж и того котри свой живот дал Богови и самим тим чловечеству? Велї думаю же на таки способ отримаю династию, квалитетни способ роботи або дацо треце, алє нажаль у стварносци то нє так.

Кед слово о непотизму и кронизму медзи Руснацами, циґанєла бим кед бим гварела же зоз тим бриґи нє маме. Велька субєктивносц, особни жажди и нєвиходзенє зоз зони комфору наисце уплївую на приношенє одлукох. Е тераз, на цо конкретно тоти непотистични акциї уплївую?

• Квалитет знука орґанизациї. – Особни чувства и фаворизованє „своїх“ зна руциц плахту опрез очох котри буду иґноровац факти же можебуц нови член одредзеного колективу нє баш роби свою роботу так як цо спада. У пракси то досц часте, маме вельо орґанизациї котри маю добру основу и приповедку, алє нажаль практично нє барз функционую.
  
• Нєдовириє и нєзадовольство знука колективу. – Велька можлївосц же приход нєкомпетентней особи доведзе до того же колектив страци квалитетну особу, окреме тоту котра на чежши и заслуженши способ дошла до тей позициї.
  
• Нєдовириє и нєзадовольство звонка колективу. – Найбитнєйша точка. Ми як мала заєднїца наисце маме нагоду шицко видзиц и дознац. Проблем настава ту кед млади особи котри маю потенциял же би зробели дацо добре, маю шицко цо потребне окрем нагоди.

Млади уметнїки, поднїмателє, бунтовнїки итд. часто нє маю шмелосци порушац себе и свойо идеї праве прето бо думаю же места за нїх нєт. То у наших заєднїцох наисце часте, бо ше зна поставиц тото питанє, же хто тебе родичи? Крев и походзенє нас повязую, алє вони би нє требали буц мира за унапредзованє себе. Опрез екранох вше исти лїца, на радию вше исти гласи, у текстох вше исти подписи. Мушиме ше запитац же до кеди тото треба же би тирвало, бо єдного дня, и тото кус цо маме щезнє. Нашо походзенє нє одлучує же кельо вредзиме, алє лєм нашо власни дїла, и пошвеценосц заєднїци котрей припадаме.