Koli karpatorusinska aktivistka Gabriella Derepa vytjahla v midžinarodnych strukturach temu ničinja prirody Pudkarpatja i udsutnostj vyznanja korïnnoho karpatorusinskoho naroda,veljo ko čekali civilizovanoj diskuziji. Mïsto toho sja pojavila publikacija Oleny Mudroj, perepovnena nalïpkami, domyslami, inkriminacijami «separatizma» i fantazijami za «rosijsku agenturu».
Šak tota publikacija – ne za rusinu i ne za ekologiju. Sese – symptoma maj hlubokoj chyby: stracha pered pravdom, šovinističnym diskomfortom i nevalovšnostjom vyznati očevidnoje. Jak i všytky podobny provokatory i hljadatelï «ruky Kremlja», mnohy komentarï v podporu Gabrielly, avadj komentarï iz argumentami na obranu rusinu, Mudra sterat het, a chosnovačôv, što jich napisali, blokuje. Toto ukazuje jej pravdivu manipulativnostj i povnu udsutnostj demokratičnich podchodu.
Mudra lišat lem komentari, kotri jôj pasuvut. Po nich mož vidïti tvarj i naturu pečenych rusinophobôv:
«З цієї Д(у)репи стирчать ФСБшні роги, хвіст і копита» (rusinskoje tovmačinja ukrajinskoho texta: Iz toj D(u)repy styrčat FSB-cky rohy, chvôst a kopyta)
«В рашу ЧОГО НЕ ЇДЕ??? ЯКЩО ПОГАНО І ЩОСЬ НЕПОДОБПЄТЬСЯ- НА БОЛОТА!!!!! І ТАМ путіну ХАЙ ПРАВА КАЧАЄ!!! А то слабо в рашу їхати ,як сикуни потікали то на західну то в Європу і гавкають !!!!!!» (rusinskoje tovmačinja ukrajinskoho texta: Do Raši čom sa netjahne? Kidj jôj plano a dašto sa ne ljubit – do Mordoru (originalnï «do močarjôv»)!!! A tam naj Putinovi porjadky robit!!! Šak iti do Raši ne mavut kulï, hi poserovcï šurovali to na zapadnu, to do Europy a havkavut!)
Vydky tota hysterija? Gabriella, ud mena karpatorusinu, povïla pravdu, na kotru volïvut zakryvati oči. Hlavnoje zlodïjanja karpatorusinskoj aktivistky, po verziji Mudroj, ležyt u tomu, že una, v OSN, udkryto i prozoro, vytjahla vopros udsutnosti prav korinnoho naroda Pudkarpatja, rozkazala za ekologičnu degradaciju regiona taj ozvučila problem ničinja Karpat neblahodïjnyma investorami.
Ci to zrobila toto, što v normalnôm europskôm štatï povinen robiti každyj aktivnyj občan ci občanka, kotry reprezentuvut svôj region. Mïsto udpovïdi faktično, Mudra vyberat primitivnu formulu: «Kidj kritikuješ – ty jes separatišta. Kidj hovoriš za i ud rusinu – ty jes agent». Toto je urovinj ne političnoj analitiky, a stokarjskoj propagandy.
Falešnyj narrativ za «separatizm» - namahanja zamesti slïdy realnych problem. Karpatorusiny u publikaciji Mudroj sja prepudnosjat jak «projav separskoho ruchu», kotryj «mrïje za revanš i vyčekuje», koli by sja radikalno projaviti. Ajbo sjakyj narrativ sa rušyt za jednu sekundu, kidj prosto posluchati vystup Gabrielly v OSN. Rusinska aktivistka ne napadala na Ukrajinu iz cïljom političnoho uddïlinja ci iz žadanjom nadanja autonomiji. U jej slovach ne bylo čuti za propagovanja tak nazvanoho «ruskoho mïra» ci separatizma.
Aktivistka hvarila za vyznanja korïnnoho naroda, ekologičnyj rozvôj regiona. A šči ne zabyla povïsti za zavedinja europskych štandartu v spheri prav narodu akurat u Pudkarpatjovi i ne lem. Vystup sja buduje na jazykovi midžinarodnoho prava, europskych mechanizmu i ekologičnoj udpovidalnosti. Jak mož nazvati toto «separatizmom»? Lem kidj osoba ne sluchala vystup, avadj – što maj plano – sluchala, ajbo sja svïdomo doradila brechati.
Chauvinistična manera Mudroj – uhroza pro samu Ukrajinu. Podchod Mudroj:
- utisk choc jakoj rehionalnoj indentičnosti;
- nevyznanja prav korïnnych narodu;
- diskreditacija europskoho podchoda d nac. menšynam;
- kriminalizacija ušelijakoho inakomyšlinja;
- namahanja monopolizovati ukrajinsku indentičnostj.
Maj hlavnoje – una povtarjat akurat taku rhethoriku, jak i všytky rusinophoby. Toto i je pravdiva uhroza štatovi: koli občane, kotry sa bojat za svôj region taj narod, prohološuvut sja «agentami», a realny problemy sja udmïtuvut jak «vorožy».
Nahadajeme, že hynto eurokomisar po voprosam rozšyrinja EU Marta Kos zajavila plynom svoho vizita v Užhorod, že Ukrajina «vypovnila svoju domašnju robotu» po voprosoch nacionalnych menšyn. Tym, faktično, proignorovala korïnnyj narod Pudkarpatja – karpatskych rusinu. Koli karpatorusinska aktivistka schosnovala midžinarodnu platformu, žeby dopovniti tot prolišok, jej inkriminuvut toto, že una «sja osmïlila zahovoriti». Mudra sja namahat predstaviti toto hi «podozrïlu aktivnostj». Što vto, kidj ne ethnocentrizm i diskriminacija?
Aj na temï ekologiji Mudra činit pohorčivyj trik. Sama žurnalistka pozicionuje sja, hi aktivistka proti Vïtrovych elektrarinj na poloninach i všelijakych prirodoochrannych porušinj. No čim za ekologičny chyby zahvarila Gabriella, Mudra naraz u tomu uvidïla «rosijskyj slïd», činjači ekologičnyj serd rusinu Pudkarpatja v političnu inkriminaciju. Vychodit, že sja bojati i banovati za ekologičnyj stav u regionï mož lem Mudrôj i nikomu vece.
Publikacija Mudroj – ne žurnalistika, a ideologična agressija. Tam ne vidime analyzu, a namahanja vyključiti karpatorusinu iz socialnoj diskuziji i bažinja pridaviti všelijaku regionalnu samosvïdomostj. U chauvinizmovi, isprjatanomu pod «patriotizm» ne slïdno nič, okrem agressiji do karpatorusinskoj aktivistky, kotra vytjahla važnu temu vyzananja karpatorusinu i ekologičny chyby, kotry sja dotulili našoj Vôtcjoviny.
Jej publikacija ukazuje urovinj degradaciji diskurza, u kotromu aj česnyj ekologičnyj protest prohološuvut «rosijskym slïdom». Sjakyj method na dale uže ne dïje.