Не раз у ня такоє были, коли ми казали: “Ты русин? Сусіда (брат, сват) ми тоже русин, бо тоже є у тōму обществі, што и ты. Авадь, кōй на мироприятях увидїв датко знакомого чōлōвіка, та пак тоже: “Видїв’им там и Ивана, вӯн, што тоже русин?” Хыба в тōму, ож много чиляди думат, што русинами є лише тоты люди, кōтрі є у русинськых орґанїзацїях, авадь кōтрі є учасниками русинського двиганя якось инак. Русин – тото “учасник общества”, сяк думат читаво кōріннōй людности Пōдкарпатя. Сякый стериотип ся пōявив, бо многочисельнї общества такуй спиршу не зачинали активну рōбōту по просвітництву, а мали свōї таланты, за кōтрі проста чилядь нич не знала. А дальша конкуренція межи орґанїзацїями не дала мотивації што  сь робити, ай привела сваду, из кōтрōй русинські діячі Пōдкарпатя не гōднї выйти й по днись.

Адде ми казали, за єдного ми цімбору, ож тото тоже русин, бо у общество русинськоє вступив. Краццї мōжу пōвісти, ож у обществі годен быти и чōлōвік другōй національности, котрый тїсно скапчаный из нашым народом тай крайом. Кидь вы будете у обществі тото Вам націoнальнōсть не дасть и нияк нацїональнōсть не пōмінят.

Дакōтрі общества гōднї быти тїсно скапчанї из русинськōв нацїoнальнōстьов через леґітимації, кōтрі ся выдают учасникам обществ, бо у них ся указує нацїональнōсть “русин”. Датко тото кличе “русинськый паспорт”. Завто пак чилядь и думат, ож без такого паспорта, русином не мож быти, та прōсят ся записати ся у русины.

Ткōсь думат, ож русинами є лише културнї тай другі дїячі, кōтрі є учасниками русинського двиганя и тїсного го пӯдпорувут. Бōгужаль, много нашōй чиляди не рōзуміє, ож русины – тото не лише дїячі тай орґанїзації. Хыбит чилядь просвітничества, убы доказати, ож кидь чōлōвік ся выдносит до русинськōй індентичности, не треба му орґанїзації и нич инше, бо и без того буде русином. Тко хоче робити на благо народа, може зробити свӯй вклад як членом орґанїзації, так и сам. Є у нас много орґанїзацїй, айбо дїля того, убы быти руснаком, не обōвязково туды вступати. Вы будете русином кидь будете у орґанїзації, и ипен так будете ним, кидь не будете.

Русины – тото не якась орґанїзація, члены закрытого клуба, русины тото кōрінна кōрінна чилядь пӯд Карпатами из свойими діаспорами.
Убы быти русином не треба цетлик из назвōв русинськōй орґанїзації тай леґетимацїю, убы быти русином, треба говорити по-нашōму, держати ся свойих звыкӯв, пӯдпоровати културу, а главноє – быти достойным чōлōвіком Ōтцюзнины, из честованьом ся ставити до свого народа тай другых.