Була то єдна од тих ноцох дзе уходзиш до обисца скриваюци очи, твар и нє як треба ходзенє. Зоз ходзеньом поготов цошка нє було у шоре остатнї три годзини. У дньовей хижи отворени дзвери, там шедзи якиш госц Словак. Ша, поздравкац би ˮДобри вечар, добри вечарˮ… Сцекай до хижи, заверай и под посцель.
Даскельо вечари потим, исти Словак у карчми Бомбай. Почина бешеда од литератури, прейґ шветовей политики до ширеня космосу. Затримуєме ше на литератури и доходзиме до того же я випатра Др Шукс цо пише до МАК-у и мам даскелї ту и там витхнути тексти. Заключенє вечара же най му шлєбодно посилам тексти, бо го интересую. Шлїдзи точка ˮРижнеˮ даскельо годзини. Потим шлїдза ище даскелї стретнуца лєм зоз точку ˮРижнеˮ.
Резултат шицкого поволанка до Словацкей з бендом Crazy cousins и специялним госцом Мирком Горняком – Колеом, леґенду керестурского андерґраунда и єдного од двоїх зоз култного фанзину ˮГлас Ректумаˮ. Найвекши премах моєй биоґрафиї: нїґда сом нє писал за Ректум.
Єдна поволанка шицко пременєла
У Словацкей дознавам же ми там видрукована кнїжка прози, поезиї и новинских текстох ˮКвашна кнїжкаˮ. Рушаю наздаваня у глави. Гммм, кнїжка у иножемстве, яке то вельке, цо годно буц, келї то пречитаю, чи достанєм публику, вирного читателя, култни статус, пенєжи… О кратки час могло подцагнуц смужку. Достало ше – нїч.
Написал сом ище дас 6 длугши приповедки, ище єден роман, 3,4 збирки писньох и послал их до Словацкей и то було тото, нє вредзело вецей полнїц фолдери зоз текстами. И, як и вше кед сом трацел мотивацию, случи ше якиш импулс котри це зобудзи. Сцигує имейл зоз Словацкей. Приповедки преложени/прилагодзени ґу словацкому и товариш Марош Воловар би то наволац ˮЄдзенєˮ. Приставам.
Видали зме ˮЄдзенєˮ и знова исте як и зоз ˮКвашнуˮ – нїч пол рока. Алє, вец якош пришол имейл зоз єдну молбу за интервю, та вец єден чески маґазин ˮА2ˮ би писац о феномену андерґаунд литератури при забутей малей меншини на Балкану. Потим єден з ведуцих сучасних словацких писательох Владимир Бала видава топ-лїстину найлєпших кнїжкох у року, дзе ˮЄдзенєˮ на першим месце. Ту би могло поставиц початну точку цалей лавини. Ту починаю дальши новински тексти, интервюи, дебати, прикази кнїжки по словацких медийох.
После шицкого шлїдзи имейл. Добри дзень, добри дзень. Номиновани ши за Анасофт награду, до перших дзешец. Довидзеня, довидзеня. Га нїч, ґуґлай цо то значи и випитуй ше людзом зоз Словацкей. Шак, добре, напевно то дацо таке як преглашенє за ˮкнїжку рокаˮ. Себе думам, озда лєм сцели мац даяку меншину у узшим вибору, як цо уж модерне у швеце.
Уж при концу рока идзе преглашенє перших пейц, дзе мойо мено знова и швидко потим шлїдзи преглашенє того єдного и тиж и награда публики.
Шедзим сам дома у кухньочки. Слухам директни пренос святочного додзельовня на радию. Представяю нас, читаю виривки и покус ми шмишне кед читаю мой виривок о чловекови цо примушени мац сексуалне одношенє зоз краву и волом… И идзе: Награда публики ˮМило Яначˮ. Аутсайдер зоз виходней Словацкей, писал о карчми, хероину и вообще о тим же ше розликуєме од жвирох прето же зме карчму видумали. Главна награда… ˮЄдзенєˮ Иван Медєши, други аут и корнер у єдним, Руснак з Руского Керестура.
Гммм, так значи. Обрацам ше ґу фрижидеру. Винїмам. Сипем жимней палєнки до погарика. З єдним поцагом го сушим. Шлїдуюци 47 минути нє було подло у моєй скори, читателю.
Потим знова по старим.
