Закруцена пипа, чи ше „Руске слово“ и на далєй будзе друковац?
Пре як уж шицким познату воєну ситуацию у швеце и общу кризу, цени рижних сировинох нєпреривно скакаю. Тото порушало и тему еколоґиї. Швет ше конєчно догварел же би шицки держави цо скорей почали еколоґийно освидомйовац своїх жительох, а медзи нїма и Сербия котра енки закруцела пипу Наци меншином и прешлїдзела тот пенєж до новооформеного Министерства за подзвигованє еколоґийней свидомосци.
Так ше и наша новинско-видавательна установа (НВУ) „Руске Слово“ нашла, могли би зме повесц, у балєґи. Як дознаваме, финансиї маю ище кущик, медзитим на велькей скупштини НВУ „Руске Слово“, после напартих дзевец годзинох (зоз два мали павзи и єдну вельку за полудзенок), єдногласно пришли до ришеня.
Управни одбор на чолє зоз директором НВУ „Руске Слово“ енки оформел одвитуюцу делеґацию котра одбегла до Українскей амабасади у Беоґраду же би ше єй опитали за финансийну потримовку. Делеґация була составена зоз трох членох найвизначнєйших руских новинарох, а чийо мена нє споминаме прето же сцели остац анонимни.
Амбасадор нашу скромну делеґацию (двойо Руснаци и єден Українєц) по швидким поступку дзечнє привитал и вислухал їх проблематику. На нєсподзиванє шицких присутних, пан Амбасадор такой пренашол и ришенє.
У официялним документу о сотруднїцтве догварене:
Держава Україна прилапи подполне финансованє НВУ „Руске Слово“, алє под двома условиями:
- У каждим новим чишлє „Руского Слова“ у штредку (дуплерица) у фарби и на масним паперу муша буц найновши вистки зоз України.
- Раз рочно муши ше друковац пригодни тираж (1000 прикладнїки) найзначнєйших українских писательох и поетох на українским язику, а котри ше потим буду задармо дзелїц шицким дзецом зоз руских оддзелєньох основней и штреднєй школи.
Наша делеґация без предумованя прилапела понукнути барз вигодни условия и такой дала предклади котри би ше дїла українских писательох могли друковац по конєц рока.
Проблем швидко ришени, а найстарши руски новини „Руске Слово“ ше и надалєй буду друковац. Руснаци ше нє муша старац же чи буду мац зоз чим розложиц огень (на подпальку), або поуцерац риц (меркуйце, рамики и дуплерица з масного папера та вам ше годно зошлїснуц).
„Я Русин бул, єсм и буду!“
*Текст гумористичного характеру и нє ма намиру же би дакого увредзел. Кажда повязаносц зоз стварнима фактами случайна або можебуц нароком.
Толкованє менєй познатих словох:
- Пипа – чоп
- Наци меншини – национални меншини
(Илустрация: Перун)