Тверджіня: У Пудкарпатьови жыє лем 10000 русинув.

Реалность: Сесе тверджіня реферує ид резултатум списованя обывательства в Украйині 2001. рока, тай майчасто ся дават у змаганьови позбавити леґітимности притомность русинув на Пудкарпатьови, авадь учинити видимость, ож русинська ідентичность — ото умиравуча тенденція. Пусля такых заяв ся часто указує мапа, што подабат на тоту, котру сьме дали долув, котра провбує указати, ож скоро “ушыткі” типирь ся ідентифікувут ги украйинці.

Што сися мапа тай тверджіня, посправді, никда ни укажут, ото тото, ож чісло 10000 — ото резултат многых хыб тай ниодповідностий, котрыма было характеризовано тото списованя. У папірьови про списованя ни мож было указати “русин” ги главну етнічну ідентичность. Тых, ко по націоналности русин, держава Украйина называт украйинцями. Як тогды чилядника мож записати ги русина, беручи на увагу сись факт, обяснити ся ни дават. Наприклад, зашто иппен у Свалявському районови жыє майбулше тых, ко ся ідентифікує ги русин? Сесе было годно быти з’язано из даяков роботов місных активіштув в часови процеса списованя, айбо влада никда ни давала обяснинь, ож як они дуйшли иппен ид такым выслідкум. Сут ай инші реґіоны Пудкарпатя, котрі и нись, и історічно сут центрами русинськой културы з май высоков кулкостьов обывательства, айбо домак ни фіґурувут у списованьови. Сесе майбулш докывує вароші тай села, де сут и свої місні русинські културні орґанізації.

Накурто — кидь люде ни годні одкрыто проголосити, ож они русины, тай указати свою исту етнічну ідентичность у державных формах, та як мож сякі резултаты унимати насеріоз? Беручи на увагу вшыткі пописані туй проблемы, нимож ся бизовати на тото списованя. Беручи на увагу днишню ситуацію в Украйині тай ото, ож пусля 2001. рока никда ся ниякоє списованя булш ни одбывало, та дуже навряд, ож у ближности зможеме дустати точні дані за кулкость русинув у Закарпатськуй области Украйины.