Стераня Русинув – процес або тенденція делеґітимізації Русинув як народа, присвоєня Русинув другым ґрупам, або представленя Русинув у выкривленуй формі. У наш час майбулше прикладув стераня Русинув находиме в державнуй політиці Україны, де ся не раз чинили горі названі дії. Пудкарпатськых Русинув часто зображуют аґентами заграничного вплыву, позад чого они не можут выражати свою реалну думку в державных масмедіях. Хыбні резултаты переписув населеня – наприклад, переписа 2001. року в Україні, котрый зазначив лем 10 100 Русинув у цілому реґіоні – хоснуют ся на іґнорованя русинської самосвідомости в реґіоні.

У соціалному животови стрічаєме пудтримку сього системного стераня окремыми Українцями, айбо сесе ся не докывує цілого українського населеня и не ограничує ся лем ними. У Словакії и Польщи мож відіти пробы замовчати злочины против Русинув, удіяні в 20. столітю, а вєдно з тым и пробы мінімізовати значеня русинського елемента в окремых реґіонах. У сих державах часто як влада, так и представителі титулної націоналности пробуют перекласти вину на бывшу комуністичну систему.

Удперати ся стераню Русинув тото непроста задача, а часто и небезпечна (окреме в Україні). Тым, тко не прилаженый на потенційну неґативну контрреакцію, мусай діяти дуже уважно. Перша обща порада – не вступайте в дебаты, де рамкы уже задані стераньом Русинув. Наприклад, кедь ткось арґументує, же проблема прав Русинув в Україні необоснована, бо Русины числят пуд 1% населеня Пудкарпатя, не дебатуйте дале на основі сього тверженя. Місто того ведіт шор дискусії на хыбность сякого тверженя, на роль системної політикы стераня в теперішнюй ситуації русинського народа. Дайте акцент на удповідалность особы и державы. Кедь ваш опонент застає проґресивні и европейські цінности, покладьте акцент на розхоженя межи сими ідеями и горі назваными учинками.