Иван Лїкар Назоры

Здогадайме ше прешлосци — думайме о будучносци

Русини ше як окремни народ отримали дзекуюци своєй виходнохристиянскей вири, а котра ше розликовала од сушедних народох. Пре зраженя медзи православну и католїцку виру як найлєпше ришенє русинске священство пришло до заключеня же би їх зєдиньованє було найлєпше ришенє у датей историйней хвильки. Тот процес тирвал цали 16. и першу половку 17. вику. Зоз Брестску (1594) и Ужгородску унию (1646), у Карпатским ареалу настала Униятска церква, односно кус познєйше грекокатолїцка и на таки способ шицки Русини постали грекокатолїки.

У Европскей историї ше 19. вик означує як вик у котрим ше почала народзовац и розвивац идеолоґия национализма. То час будзеня националней свидомосци велїх народох, насампредз гевтих котри нє мали власну державу. Тот процес залапел и Русинох у Карпатским ареалу. Два особи котри найзаслужнєйши за будзенє националней свидомосци при Русинох то були: грекокатолїцки паноцец Александер Духнович и Адолф Добрянски, посланїк у Угорским парламенту и австрийски службенїк. Медзитим, скорей нїх тоту роботу розпочал епископ Андрий Бачински.

Андрий Бачински

Владика, педаґоґ и просвититель Русинского народу. Народзел ше 14. новембра 1732. року у Бенятини. Ґимназию закончел у Ужгороду, а филозофию и теолоґию у Трнави. За грекокатолїцкого паноца пошвецени є 1756., а 1773. року папа Климент XIV. го меновал за епископа Мукачевскей грекокатолїцкей епархиї, котру преселєл до Ужгороду, а сновал и Ужгородску богословску семинарию (1778).

Мария Терезия 1777. року преглашела реформу школства котру на Подкарпатю окончел владика Бачински. Потримал снованє Учительскей семинариї у Ужгороду. Закладал ше же би школи у Ужгороду були на русинским народним язику. Тиж так, русински язик бул официйни язик епископскей канцелариї.

Бачински видал Библию преложену на церковнославянски язик, основал епископски архив и библиотеку, створел круг просвитительох, котри писали учебнїки за новоосновани школи и интересовали ше за историю рускей церкви. Умар 19. децембра 1809. року у Ужгороду.

Александер Духнович

Прешовски каноник и будитель националного препороду Русинох. Народзел ше 24. априла 1803. року у валалє Тополя. По законченю Богословиї (1827), першу службу достава у Прешове. Пре нєскладанє зоз владику, премесцени є до Комлошу (1833). Гоч бул воспитовани у „мадярским духу“, у тим периоду дозрева його чувство припадносци ґу Рускому народу. Року 1838. меновани є за новтаруша Ужгородскей конзисториї, а 1843. є меновани за каноника у Прешове, дзе препровадзел остатнї два децениї свойого живота. Написал писню „Я Русин бул, єсм и буду“, котра з часом постала гимна Русинох. Бул значна особа у националним будзеню подкарпатских Русинох. Умар у Прешове, 30. марца 1865. року.

Адолф Добрянски

Рударски инжинєр, правнїк, визначни русински политичар. Народзел ше 8. децембра 1817. року у Рудлову. Ґимназию закончел у Лєвочи, филозофию и право студирал у Еґеру.

Пририхтал меморандум за зєдиньованє територийох на котрих жию Русини до автономней покраїни у Австрийским Царству. Под час револуциї (1848-49) службовал як австрийски цивилни поверенїк зоз русийским войском, котре помогло Австриянцом же би зопарли повстанє.

Австрийскому цару представел проєкт подзелєня Угорскей на национални округи под назву Меморандум мадярских Русинох 1849. року. Проєкт одобрени, а Добрянски бул меновани за главного управителя уряду новоснованого округу Ужгород. Спрам одлуки министра Александра Баха (28. марца 1850) о ликвидациї гражданских правох у Мадярскей, Ужгородски округ утаргнути.

Упарто бранєл права Подкарпатских Русинох и три раз бул виберани до мадярского парламенту. Бул предсидатель Дружтва св. Йоана Крестителя у Прешове и Дружтва св. Василия Велького у Ужгороду. Умар 19. марца 1901. року у Инзбруку.

Дїялносц Духновича и Добрянского помогла зачувац национални идентитет, алє им ше нє удало вибориц за даяку файту автономиї або на даяки способ политично припознац Русинох. У периоду после 1867. року Угорска держава почала зоз мадяризацию шицких националних меншинох, та так и Русинох. До пременки приходзи после Першей шветовей войни кед почина друге будзенє националней свидомосци и указує ше нагода за автономию Подкарпатскей Руси. Ту глїбоки шлїд охабели: Григорий Жаткович, Андрий Броди, Авґустин Волошин, Евґений Сабов, Иван Гарайда, Павел Ґойдич и велї други.

Григорий Жаткович

Америцки правнїк и политичар руского походзеня. Народзел ше 2. децембра 1886. року у валалу Голубиноє и пошвидко ше з родичами преселєл до ЗАД-у. Право студирал у Пенсилваниї. По 1918. бул адвокат у Дженерал Моторсу, а потим є поволани до Америцкого националного совиту Угро-Русинох, котри му дал задаток же би направел меморандум за предсидателя ЗАД-у Вудрова Вилсона о положеню Подкарпатскей Руси у Европи.

Жаткович Русинох тримал за окремни народ. За плебисцит гласало 67% америцких Русинох же би ше Подкарпатска Рус припоєла ґу Чехословацкей.

У Ужгороду, Централна руска народна рада тиж потримала и препоручела Жатковича за ополномоценого министра. Медзитим, Чехословацка на чоло держави положела свойого управителя, а Жаткович водзел лєм дочасове Равнательство без правого значеня. Вон тото одбил, кед ше у медзичаше пременєл статут Подкарпатскей Руси и Прага на чоло положела Жатковича за ґувернера, алє ознова без достаточних овласнох, покля вивершна власц була у рукох ческого уряднїка – вицеґувернера.

После дзешец мешаци, Жаткович дал задзекованє як знак протесту процив централистчней политики Праги. Розчаровани ше врацел до ЗАД-у, з чим Русини на Подкарпатю мали вельку утрату. Умар 26. марца 1967. року у Пицбурґу.

Авґустин Волошин

Паноцец, публицист, русински политичар українского напряму. Народзел ше 17. марца 1874. року у Келечину. Дипломовал на Богословиї у Ужгороду и Будапешту. Робел як учитель и равнатель Учительскей семинариї у Ужгороду.

Як член и снователь Рускей народней ради у Ужгороду, а потим и предсидатель Централней рускей народней ради, Волошин одбавел важну улогу у процесу националного самоодредзованя Подкарпатскей Руси. Року 1919-20. бул член дочасовей автономней вивершней власци Подкарпатскей Руси. Предсидатель Чехословацкей 1938. року Волошина меновал за премиєра автономней влади Подкарпатскей Руси, а 15. марца 1939. року Парламент Карпатскей України го вибрал за предсидателя нєзависней держави.

После Мадярскей инвазиї, Волошин емиґровал до Праги. Совєтска тайна служба го 1945. року влапела и депортовала до Москви. Умар у московским гарешту 19. юлия 1945. року.

Евґений Сабов

Грекокатолїцки паноцец, просвититель и русински културни дїяч. Народзел ше 1. октобра 1859. року у Вербяжу. После ґимназиї закончел Богословию у Ужгороду, а потим робел як професор руского язика у ужгородскей ґимназиї.

Бул єден з перших котри преглашел окремносц Русинох, їх розличносц од восточнославянских народох – од Русинох и Українцох. Борел ше за очуванє руского язика як окремного предмета у штреднїх школох. Тоту битку страцел и пошол до парохиї у Севлюшу (нєшка Виноградов). Од 1917. року бул архидиякон у Уґочи.

Оштро критиковал дїялносц проукраїнского здруженя Просвита. Бул сооснователь и почесни предсидатель Дружтва А. Духновича. Написал историю рускей литератури и повязал ю зоз розвойом русинского школства (1925). Його Христоматия длуго була єдине жридло познаваня русинскей литератури.

Юния 1930. року на ньго окончени атентат з боку припаднїкох українскей воєней орґанизациї и бул чежко ранєти. Умар 3. новембра 1934. року у Севлюшу.

Подкарпатскей Руси у составе Чехословацкей репубики нє було лєгко. Вона нєпреривно одкладала даванє автономиї обецаней на мировней конференциї у Паризу. Под час Другей шветовей войни, кед Гитлер забера остатки Чехословацкей, Подкарпатску Рус 1938. року забера Мадярска (Мадяре ю наволую „Карпаталя“). На щесце Русинох, за пременку ше на їх териториї нє водзели войни, цо вшелїяк дїйствовало на розвой русинского народу. Мал право на културни живот, язик у школох бул угро-руски, дошлєбодзени новини, литературу на русинским язику и културни дружтва. Року 1941. сноване и Подкарпатске наукове дружтво (ПНД) котре дїйствовало по 1944. То була свойофайтова русинска наукова академия. Вельки печац за собу зохабел Иван Гарайда, єй вивершни директор.

Иван Гарайда

Мадярско-польски язичар русинского походзеня, прекладатель, редактор и видаватель. Народзел ше 29. януара 1905. року у Заричеву. Дипломовал на Правним факултету у Будапешту. На початку ІІ. шветовей войни вєдно зоз колеґами на Яґелонским факултету влапени є и заварти до концентрацийного лаґру у Саксенхаусену. На яр 1940. року бул чежко хори и пущени є на интервенцию Мадярскей дипломатиї. Преселєл ше до Ужгороду, дзе ше уключел до културного живота.

Бул вибрани за вивершного директора Подкарпатского наукового дружтва (1941). Гарайда бул редактор и видаватель наукового часопису Зоря/Гайнал, як и литературних часописох Литературна недиля, Руска молодеж, Дзецинска библиотека и Литературнонаукова библиотека. Писал вельки господарски календари, публиковал моноґрафиї и преклади.

Його найзначнєйше доприношенє то Граматика руского язика (1941) з котрим закончел його процес кодификациї. Значне му и дїло Обща библиоґрафия Подкарпатя.

После приходу Червеней армиї на Подкарпатску Рус 1944. року влапела го совєтска контраобвисцуюца служба СМЕРШ. Обвинєти є за фашистичну аґитацию, дїйствованє процив комунистичного руху, Совєтского Союзу и демократских державох. Умар под час випитованя 13. децембра 1944. року у ужгородским гарешту.

Павел Ґойдич

Русински грекокатолїцки церковни уряднїк и теолоґ, владика Прешовского владичества. Народзел ше 17. юния 1888. року у Руских Пеклянох. Ґимназию закончел у Прешове, а теолоґию у Прешове и Будапешту. Пошвецени є 1911., а за владику 1927. року. Верховни поглавар Грекокатолїцкей церкви у Чехословацкей постал 1946. року.

Помагал видаванє кнїжкох и часописох на русинским язику, як и русинску културу и образованє у виходней Словацкей. Моцно ше процивел словаченю Русинох. После Минхенского зрадзеня закладал ше за приключованє териториї дзе жию Русини ґу автономней Подкарпатскей Руси. Под час войни процивел ше депортациї Жидох.

Глєдал можлїву догварку медзи церкву и режимом 1948. року. Медзитим, чехословацки комунисти поступели процив Грекокатолїцкей церкви по совєтским моделу. Церковни собор у Прешову котри орґанизовала и водзела Державна безпечносц (StB/ŠtB), претаргла дїйствованє Грекокатолїцкей церкви у Чехословацкей. Владика Ґойдич влапени (1951), обвинєти за процивдержавне дїйствованє и осудзени на доживотни гарешт. Бул загарештовани у Леополдову, дзе и умар 17. юния 1960. року, на свой 72. родзени дзень.

Держава го 1990. року рехабилитовала. Одликовани є Орденом in memoriam ТҐ Масарика и Прибиним крижом. Папа Иван Павле ІІ. го 2001. року преглашел за блаженого.

Єдна присловка гутори: „Шицко цо красне, кратко тирва“ – так и просперитет Русинох на „Карпаталї“. После войни союзни держави ше догвавели же Подкарпатска Рус будзе ознова часц обновеней Чехословацкей держави. Медзитим, октобра 1944. року, Сталїн ше предумал, анексирал Подкарпатску Рус и припоєл ю ґу Совєтскей України. Од теди та по нєшка, Русини ше на Подкарпатю нєпреривно одупераю нємилосердней политики и присилней асимилациї.

Так закончене и загашене друге будзенє нашого народу. Посцигнути успихи нє були достаточни. Єден з проблемох и тот же ше Русини нє могли догвариц коло заєднїцких цильох. Якошик вше кед достанєме нагоду же бизме направели дацо вельке за свой народ, место най ше тримали вєдно, ми ше вадзиме и дзелїме. Под час Подкарпатскей Руси исновало тельо рижни опредзелєня при Русинох же ше до конца нє знало „хто пиє, а хто плаца“. Було ту русофилох, українофилох, мадяронох, алє було и гевтих котри ше наисце борели за народ – за Русинох!

Учме з тей историї же бизме нє повторели нашо гришки. Здогадуйме ше и паметайме русинских преднякох, алє нє жийме у прешлосци, прето же анї вони нє жили, намагали ше нам обезпечиц лєпшу будучносц. Час Духновича, Добрянского, Жатковича и других одавно прешол. Тераз нам потребни нови млади надїї котри зоз провадзеньом їх прикладох одпочню нове, треце будзенє националней свидомосци, предлужа там дзе вони станули и витворя Русински сон!

Похасновани жридла:

  • Magocsi, P. R. (2009): Narod niotkuda: Ilustrirana povijest Karpatorusina/komentari i ilustracije: Valerij Pađak; prijevod na hrvatski jezik: Eugenija Vrabec. Užhorod, Naklada V. Pađaka
  • Поп, И. (2021): Мала история Русинох, Руска матка, Руски Керестур
  • Аристов, Ѳ. Ѳ. (1929): Карпато-русскіе писатели: Александръ Васильевичъ Духновичъ, Изданіе Культурно-просвѣтительн. общества имени Александра Духновича вь Ужгородѣ, Ужгородъ
  • Rusíni Slovenska (www.rusyn.sk)
  • Медвідь, П. (2022): 290 років од народжіня Андрія Бачіньского, єпіскопа і просвітителя, ЛЕМ.фм
  • Markus, V. (1993): Voloshyn, Avhustyn, Encyclopedia of Ukraine, vol. 5 (www.encyclopediaofukraine.com)
  • Markus, V. (1984): Dobriansky, Adolf, Encyclopedia of Ukraine, vol. 1 (www.encyclopediaofukraine.com)
  • НАР (2017): Aleksandar Duhnovič (nar.org.rs)