Богатство живота ше одражує през нашо дожица. Тот хто ма вецей дожица, його живот постава богатши, виполнєти з рижнима подїями, искуством, путешествиями, любову и велїма другима стварами. Живот тиж можеме спатриц и як єден вельки океан, у котрим ше зменює слунко и благи витрик зоз бурю и велькима габами, а потим ознова ошвитнє слунко, наша гвизда щешлївей драги. Шицки людзе як поєдинци у тим океану, котрого можеме наволац „океан живота“, представяю мали ладї, котри ше нєпреривно одупераю рижним препреченьом на отвореним морю и провадза свою „гвизду щесца“.

У „океану живота“ заплївал и Адорян Чизмар зоз Коцура. Ма дефиновани даскельо цилї и задовольни є як напредує у їх витворйованю. Попри роботи, як гвари, за добре функционованє цела и души потребна и розвага, котру пренаходзи у друженю з товаришами, природи, граню ґитари, бависку зоз своїм псом, лєбо у даяким добрим филму. Вон, провадзаци „гвизду щесца“, збогацел свой живот и достал рижни искуствия. Витворел свойо жаданє зоз дзецинства и опробовал живот на дескох прейґокеанскей ладї. Його интересантне дожице годни сце дознац у дальшим тексту.

Адорян гвари же одмалючка слухал приповедки своєй сушеди котра ходзела робиц на ладю и так шицко почало:

– На 15 роки сом почал виглєдовац о тим способу живота. У мнє ше народзела идея и жаданє же бим ше и сам у тим опробовал. Як сом ше информовал и заинтересовал за тоту роботу, так сом през каждодньову комуникацию з людзми у своїм живоце дзелєл тот мой сон. Нїхто нє бул нєсподзивани, задумал сом то як животну авантуру, фамелия и ближнї ме у тим потримали. Условиє же бим ше занял на ладї було же бим минимално мал 21 рок, та сом предлужел зоз животом и одлучел кеди-теди виполнїц свой сон.

По законченей штреднєй школи, опробовал ше на факултету, медзитим, пошвидко видзел же то нє за ньго и почал глєдац роботу:

– Дознал сом же єдна месна индустрия у Новим Садзе глєда людзох котри сцу научиц тото ремесло. Закончел сом едукацию за месара и почал робиц у истей месней индустриї. Там сом робел два роки и праве за тот час здобул нєобходне искуствиє, зашпоровал пенєжи и точно на дзень мойого 21. родзеного дня пошол до Беоґраду, приявиц ше за роботу месара на прейґокеанских ладьох за компанию „Принцез Крузерс“.

З оглядом же сполньовал шицки потребни условия, шлїдзела му интензивна штиродньова едукация у Беоґрадзе, а закончовала ше з формалну розгварку зоз представнїками компаниї зоз Италиї. Нєодлуга достал обвисценє же ше успишно приявел и же може пойсц до Америцкей амбасади глєдац визу котра му була потребна за роботу.

– Перши контракт ми почал у априлу 2016. року. Першираз сом лєцел на авиону до Маямию, Флорида, ЗАД. Мал сом щесца же сом на беоґрадским аеродрому упознал людзох котри ишли робиц на исту ладю як и я. Вони за собу мали уж даскельо контракти, та ме упознавали з тим цо ме чека.

Адорян ше здогадує яки на ньго упечаток зохабела ладя кед ю першираз видзел:

– Вищирел сом очи кед сом станул опрез ладї на хторей сом требал жиц и робиц шлїдуюци шейсц мешаци. Ладя мала 330 метери, 38 метери була широка и 142 тисячи тони чежка. Патрел сом на будинок од 19 поверхи котри, якимшик чудом, идзе по води. Кед зме вошли нука и провадзели людзох чия робота була же би нас упознали зоз стандардним процесом придружованя нових морякох, чувствовал сом ше як кед бим вошол до огромного лавиринту. Перши тидзень сом глєдал помоц кед сом сцел пойсц до своєй кабини, мензи… На щесце, шицки заняти, котри и сами раз були у моєй скори, дзечнє ми помогли.

Други контракти започинал у Ванкуверу, Трсту, Синґапуру и Сиднею. Як гвари, їх початки вецей нє були таки чежки. Каждираз бул на другей ладї. Мал нагоду робиц на ладьох Реґал, Роял, Maджестик (три идентични ладї) як и Исланд, Сафир, Сан котри кус менши и цалком розлични.

Компания за котру робел теди мала флоту од 18 ладьох. Найвекша на котрей робел мала капацитет максимум 3.600 путнїкох, 1.500 занятих и длужини 330 м, покля найменша на котрей робел була капацитету 2.200 путнїкох, 900 занятих и 290 метери длужини. Ладї знука маю даскельо ресторани, спа центри, вельки сали за полудзенок и вечеру, театер, бар, базен на отвореним, терховню, спортски терени на отвореним, рижни предавальнї и окремни простор за розвагу занятих.

Робота месара на ладї нє лєгка и ма вельки одвичательносци:

– Три або штири раз мешачно сциговало змарзнуте месо котре зме складали до змаржлякох. Требало ше постарац же бизме на час мали досц одмарзнутого меса за рижни єдла котри по рецепту требало порихтац и прешлїдзиц кухаром. Робел сом у екипох од 9 по 12 месарох. Робота чежка, контракт тирва шейсц мешаци. Роби ше кажди дзень по 12 годзини. После три мешаци вистатосц „вежнє свойо“ и по конєц контракта „авто пилот“ бере команду над целом. Мнє ше то нє пачело. Нє пачела ми ше монотоносц роботи и хибело ми уключованє моєй менталней и креативней часци.

Двоме Руснаци на єдней прейґокеанскей ладї, дахто би подумал же франта, алє и таке можлїве:

– У першим подписаним контракту, на ладї було 1.300 занятих, а медзи нїма и мой товариш зоз Руского Керестура. Понеже 80 одсто занятих Азияти и даскельо Европейци, барз мала можлївосц же би ше стретли двоме Руснаци, алє и то ше случело. У хвилькох вистатосци од каждодньовей роботи, обидвом нам було лєгчейше кед бизме прегварели на мацеринским язику и так призабули же зме далєко од свойого дому.

Адорянови робота му оможлївела же би упознал рижних людзох и преширел свойо погляди на швет:

– Упознал сом людзох котри жию на малих островох без струї и води за пице и людзох котри жию у пренаселєних, заґадзених варошох котри одмалючка нє вишли зоз свойого квартелю без медицинскей маски на твари. Кед спознаце у яких шицко иншаких, та и (за нас) чежких условийох, чловек може жиц и ховац фамелию, кед видзице чловека котрому єдине задовольство любов ґу блїжньому и єдноставносц живота, вец шицки национални и етнїчни означеня траца свой смисел.

Єдно путованє ше вола „круз“, котре найчастейше тирва од 7 по 15 днї, алє єст и таки од 5 днї по 3 мешаци (коло Жемовей кулї). Нащивел рижни места и розчаровал ше до уплїву капитализму на векшину дестинацийох. Як приклад дава Малезию, Тайван и Виєтнам котри присподобели урбанистични план свойого варошу туристом же би здабали на модерни заходни вароши, а туристи пришли видзиц тото цо дома нє маю. Медзитим, даєдни дестинациї му остали у красним паметаню:

– Попачел ми ше Синґапур, варош-держава котрей ше удало зачувац прекрасне желєнїдло на своїх улїчкох. Варнемунде, мали нємецки валалчик на самим побрежю Балтицкого моря, Велинґтон на Новим Зеланду, Пуерто Валярта – Мексико. Робота ми нє дошлєбодзовала вельо шлєбодного часу. У стред дня сом мал павзу 2-5 годзини и намагал сом ше, вше кед то було можлїве, висц вонка, пообиходзиц варош и його знаменїтосци.

На ладї муши буц дисциплина, а шицких занятих вяже єдна характеристика:

– Кажди заняти на ладї моряк и одвичательни є же би почитовал ланєц команди (гиєрархийну структуру) и рижни безпечно-орґанизацийни системи. У случаю нєпредвидзеней опасней ситуациї кажди заняти и „у сну“ муши знац цо треба робиц же би защицел свой и цудзи живот. Два або три раз мешачно отримую ше вежби („crew drill“). На таких вежбох зме през симулациї преходзели опасни ситуациї и нашо задатки. Цо робиц кед вибухнє огень, дахто спаднє до моря, нападаю пирати лєбо треба евакуоац людзох до чамцох за спашаванє. Тоти вежби занятим барз допити, алє ше у ридких ситуацийох указали як наисце хасновити.

Од Адорянового остатнього контракту прешло вецей як три роки:

– Як дзецку ми ше пачела идея жиц на ладї и путовац по швеце. Кед сом вироснул, опробовал сом таки живот и попачел ми ше добри заробок. Уж после другого контракту сом страцел возбудзенє за путованьом и єдина мотивация за шлїдуюци контракт ми бул пенєж. Пенєж найгорша можлїва мотивация у живоце. Кед сом дошол до нових интересованьох и одлучел им придац векшу повагу, пришол час же бим спущел свойо сидро. Цалком сом задовольни зоз свою кариєру на ладьох, од початку по єй конєц, праве прето бим нє пошол ознова. Кеди-нєкеди ми ше яви дахто заинтересовани за роботу на ладї. Намагам ше посовитовац дзе и як би ше приявел и яки там живот. Кажде хто ма можлївосц и жаданє, треба же би ше опробовал. Ми сами себе єдине праве препреченє!

Адорян, провадзаци „гвизду щесца“ у нємирним „океану живота“, пренашол острво на котрим спущел свойо сидро и рушел по новей драги. Єдну часц свойого живота збогацел зоз прекраснима и драгоцинима дожицами котри му помогню у будучносци. Нє бойме ше експериментовац и опробовац у рижних авантурох, як Адорян гутори: „Ми сами себе єдине праве препреченє!“